سوزان مبارك اسمها الاصلانى سوزان صالح ثابت ( اتولدت فى محافظة المنيا ، 28 فبراير 1941 ) ، مرات رئيس مصر السابق حسنى مبارك و سيدة مصر الأولى من 1981 ل 2011 ، ابوها دكتور مصرى متخصص فى طب الاطفال وامها ممرضه ويلزيه اسمها ليلي ماى بالمر Lily May Palmer. اخدت ماجيستير فى السوسيولوجيا ( علم الاجتماع ) من الجامعه الامريكيه فى القاهره سنة 1982. اهتمت وقت رياسة جوزها و اضطلاعها بدور ست مصر الاولى بتنمية المجتمع ( مجال دراستها ) ، و كان ليها حضور مهم فى الأنشطه الثقافيه ، و عملت مشروع القراءه للجميع - مكتبة الأسرة و هو مشروع ثقافى عظيم استفاد منه مصريين كتير. و اشرفت على بنا و تطوير مستشفى سرطان الأطفال فى القاهره لعلاج اطفال مصر الفقرا. خدت جوايز عالميه كتيره كتكريم ليها على جهودها فى التنميه و التطوير الثقافى. شئون المرأه و النهوض بالست المصريه كان كمان من اهتماماتها. عندها من حسنى مبارك ولدين هما علاء مبارك و جمال مبارك.
اتولدت سوزان مبارك فى محافظة المنيا فى صعيد مصر. درست فى مدرسة سانت كلير فى حى هيليوبولس فى القاهره و بعد ما خلصت المدرسه دخلت الجامعه الامريكيه فى القاهره و حصلت على بكالريوس فى العلوم السياسيه سنة 1977 و بعدين على ماجيستير فى علم الاجتماع سنة 1982.
مستشفى سرطان الأطفال اشرفت عليه سوزان مبارك.
القرأه للجميع مشروع ثقافى عظيم دشنته سوزان مبارك.
اهتمت سوزان مبارك بتنمية الطفل المصرى و اشرفت على حلقات الاطفال المعروفه بإسم " عالم سمسم " المدبلج من الانجليزى اللى بينمى قدرات الاطفال فى التواصل الاجتماعى و فى القرايه ، و فى سنة 1985 انشئت " متحف الأطفال " فى القاهره بالتعاون مع المتحف البريطانى عشان يستفيد الاطفال المصريين و يتعرفوا على التاريخ. فى سنة 2005 افتتحت فرع لمكتبة مبارك العامه فى مدينة الغردقه.
دعمت سوزان مبارك مستشفى سرطان الأطفال فى القاهره و اشرفت على بناها و تطويرها بنفسها و اترأستها و قدرت إنها تجذب تبرعات كتيره ليها من الخارج لغاية ما بقت من أكبر مستشفيات علاج سرطان الأطفال فى الشرق الأوسط و بيتعالج فيها اطفال المصريين الفقرا اللى ما عندهمش اماكنيات للعلاج.
حصلت سوزان مبارك على جوايز و تكريمات دوليه كتيره على جهودها و انشطتها الاجتماعيه الثقافيه فى مجالات تنمية الطفل و تحسين وضع النسا ، و منحتها كذا جامعه دكتوريات فخريه. منظمة اليونيسكو اهدتها " ميدالية ابن سينا " لجهودها الثقافيه و ادتها منظمة اليونيسيف " جايزة موريس باتى " لجهودها الاجتماعيه فى مصر.
تعليمها و دراستها:
ماجيستير فى علم الاجتماع - الجامعه الامريكيه فى القاهره. 1982
بكالريوس فى العلوم السياسيه - الجامعه الأمريكيه فى القاهره. 1977
الشهاده الثانويه - مدرسة سانت كلير فى القاهره
